O le masina lenei o Aokuso aga’i atu i le masina o Novema ua faailoa e le Matāgaluega o Puna’oa Faalenatura ma le Si’osi’omaga ua māfanafana ai ogasami o Samoa, o le māfua’aga lena ua aga’i mai ai i’a o le tafolā e fananau ai.
O lea faamatalaga mai le matāgaluega i lana upega tafa’ilagi ua faailoa ai foi ma le vaaia o tafolā i o tatou ogasami i ni asiasiga a sui o le matāgaluega.
Ua fautuaina ai le atunuu aemaise o le ‘aufagogota ina ia taumamao ma tafolā pe a vaaia i ni ogasami.
O se tasi lea o meaola o le sami o loo puipuia ma faasao e Samoa e pei ona aiaia i le tulafono faatonutonu mo le puipuia o meaola o le gataifale, le Samoa Marine Wildlife Regulation o le tausaga e 2009.
O le Aso Lulu i le galuega a sui o le Matāgaluega o Puna’oa Faalenatura ma le Si’osi’omaga na vaaia ai se tafolā i se tasi o ogasami o Samoa.
