O le nofoaga o a’oa’oga a leoleo o le malo o Ausetalia i le setete o Kuiniselani e ta’ua o Pinkenba Training Hub, o loo tapenapena ai leoleo e to’alima mai Samoa e ala i ni a’oa’oga auā le sauni ai e faatino tiute o le polokalame a Malo Aufaatasi o le tausia o le filemu, le UN Peace Keeping Mission.
Ua faailoa e le Matāgaluega o Leoleo, Falepuipui ma le Toe Fuata’ina le filifilia o ia malu o le malo ma maua ai le aofa’iga e limasefulufā o alii ma tama’ita’i leoleo mai le Pasefika i atunuu e pei o Samoa, Kilipati, Fiti, Timor Leste, Solomona, Vanuatu, Tonga, Tuvalu, Nauru lea ua suia le igoa o Naoero, Papua Niu Kini, ma Ausetalia o loo feagai ma ia a’oa’oga mo le umi e lima vaiaso.
Ua faailoa e le pulega o galuega faaleoleo a le malo o Ausetalia le Australian Federal Police poo le AFP, o le nofoaga ua tapuvae tasi iai ia a’oa’oga o se faamoemoe tāua e tapena ai leoleo o le Pasefika mo le ofoina o le puipuiga ma le tausia o le filemu e lē gata i atunuu o le Pasefika ae faapea ai le lalolagi e ala i le polokalame o le tausiga o le filemu a Malo Aufaatasi.
O le tau amataga o le masina nei o Aokuso na tatala ai lea a’oa’oga e le sui failautusi mo auaunaga o le tausia o le filemu a Malo Aufaatasi o Jean Pierre Lacroix ma le faufautua mo ngaluega faaleoleo a Malo Aufaatasi.
Sa auai foi ma sui o matāgaluega a leoleo mai atunuu o le Pasefika.
