I le mae’a ai o le tautua a le alii o Tuna Tuitama mo le ‘au a le Moana Pasifika, ae o lea ua filifilia ma sainia atu e le Highlanders e ta’alo mo le latou kalapu.
Ma o se matāti’a iloga ua patipatia i le faaaogā ai o lea alo o le atunuu mo lana taleni lakapi, aemaise foi le tulaga ua iai le Moana Pasifika.
E lua tausaga na ta’alo ai Tuna mo le Moana, ma sa faapea foi ona ia ta’alo mo le ‘au a le Manu Samoa Ta’ito’asefululima i le tausaga e 2024, ma le ‘au Ta’ito’afitu a le atunuu, lea na faamauina ai le mata’ina o le ta’alo a lea alii.
I faamaumauga, e 30 ana sikoa na maua i le 56 o ana taaloga sa taalo ai mo le ‘au Ta’ito’afitu.
Faamauina le faaalia o le agaga faafetai a lea alo o Samoa i le avanoa, na ia faafetaia le Taapau Sili ma si ona aiga, i le lagolago mai lava i Samoa se’ia oo mai i lenei atunuu mo taaloga faapolofesa.
Ta’ua e Tuna o le a ia taumafai malosi ina ia faatumauina le lelei o ana taumafaiga i le maua ai o le avanoa i le ‘au a le Highlanders.
E lua tausaga o le a taalo ai Tuna mo le ‘au a Otago i taaloga a le Super Rugby Pacific.
Comments
Loading comments…