Samoan oranges (Moli)

Tetele fuata moli samasama ai le taulaga i Apia

Ua vaaia le samasama o le tele o nofoaga eseese o le taulaga i Apia i autafa o le alatele, luma o faleoloa ma nofoaga e tumutumu i ai tagata ona o le tetele o le fuata moli saina i lenei vaega o le tausaga.

O le fuata masani o le moli saina ma moli Samoa, e faotaga ma luu tupe ai aiga i Savaii aemaise i le faaitu o Asau e ola tele ai le laau o le moli.

O le molimau mai a nisi o le au faatau moli, a lelei le aso e oo lava i le afe tala le seleni e maua, a feololo o lalo mai o lea aofaiga e maua.

O se taimi lelei foi lenei e maua ai seleni mai lea laau tau faatoaga e fesoasoani i pili o le fanau, ma isi fuafuaga e pei o meafai o le lotu ae e taualuga lava i se faatauga o taumafa ma isi oloa e tāua ma aogā mo le aiga.

O le toatele o le au faatau moli mai Salafai e malaga mai lava i Upolu i le taulaga e faatau ai ona e toatele tagata faatau. Ua fetaui foi le talatala o aiaiga o vavao i le umi o taimi o galuega ma faatauga ma le tetele o le fuata moli.

Scroll to Top

Keep uptodate with Radio Samoa activity & promotion

* indicates required