E eseese finagalo faaalia o tagata I nisi o ata ua aliae I luga o upega o fesootaiga ua vaaia ai el faitau afe o avoka ua lafoai I se nofoaga I Kuiniselani ua pala ai ma maumau.

O le lipoti a le 7News ua faailoa ai ni faatalanoaga ma el aufaifaatoaga aemaise o sui o faleoloa I lea itu o Ausetalia ma ua atagia ai ua tele mamao atu le sapalai ole avoka I le taimi nei nai lo le manaoga o loo iai.

Sa maualuga le tau o le avoka I nai masina ua tuanai atu ma faafaigata foi ona faatau e le toatele I faleoloa aemaise foi I Sini peitai o le aliae o lipoti I le aso e faatatau I le faitau afe o avoka ua maumau, ua faailoa ai e nisi sa tatau lava ona faia se fuafuaga e tufa nei avoka I nai aiga o manaomia le fesoasoani aemaise foi o nofoaga o tausia ai le au matutua ma I latou e  leai ni fale e nonofo ai e fesoasoani ai I lenei vaitau o le taugata o le soifuaga.

Peitai I faatalanoaga I lea lipoti ua taua ai foi e le aufaifaatoaga o se tulaga faigata mo latou le vaaiga lea aua o le malosi foi ma le taimi na alu ai I le totoina o le fualaau peitai ua tele lava le sapalai ma ua faia ai le faaiuga e lafoai.