O le a toe saili se isi faamasino o le faamasinoga sili e suesueina le talosaga a Lema’i Faioso Sione ma Malele Atofu Paulo lea sa faatulaga e suesueina i le Aso Tofi o le vaiaso nei i luma o le afioga i le tamaitai faamasino le afioga Tafaiomalo Leilani Tuala Warren.

O loo talosaga Lema’i ma Malele e taofi taualumaga a le faamasinoga poo le stay of proceedings i lo la moliaga o le taupulepule e faaoo le maliu i lē sa avea ma Palemia o le atunuu.

Ua toe faatulaga le talosaga e fofogaina i le faamasinoga lava lea i le Aso Gafua asau ma o le a saili ai se aso o le vaiaso fou e fofogaina ai i luma o se isi faamasino.

Ua mafua lea ona o le afioga i le faamasino o Tafaoimalo Leilani sa ia suesueina le moliaga foi lava lea e tasi o Taualai Leiloa na ioe ma faasala ai i le falepuipui.

O le faamasino foi lea na suesueina le talosaga a Lema’i ma Malele ina ia tatala i tua i ni aiaiga e faatali ai lo la faamasinoga.