O loo faatalia nei seisi faamatalaga lata mai mai, mai le malo o Samoa e faatatau ile mataupu ua lipotia I luga o upega tafailagi e aofia ai nisi o le aufaigaluega faavaitaimi mai Samoa na auina atu I Ausetalia. O le lipoti sa faasalalauina e le leitio faasalalau ale SBS i Ausetalia ua faailoa ai se tulaga le lelei o loo tausia ai le aufaigaluega aemaise o totogi o loo o latou mauaina.
Ile faatalanoaga a le Radio Polynesia ma le minisita o loo feagai ma le matagaluega o loo faafoeina lea auaunaga, Leatinuu Wayne Sooialo, pei ona taua ile Radio NZ Pacific ua faailoa ai ele minisita lona le fiafia tele ina ua faitau ile lipoti mai Ausetalia ma ua tusi atu nei ile ofisa sili o le MCIL, Lemalu Nele mo se lipoti faavave ane o le mataupu lenei. Ua faailoa foi e le minisita I lea lava lipoti ole a faailoa foi le mataupu ile Kapeneta mo se faaiuga vave.
I le lipoti a le SBS ua faailoa ai molimau a nisi o ilatou oloo ile setete o Vitoria ile itu I sasae ma ua taua ai ua le ese le faiga oi latou ma ni pologa ua omia faatasi I se nofoaga laititi ma o le mau a leisi tagata faigaluega e uma ane le 73 itula faigaluega ile vaiaso e nao le 300 tala le totogi mama.
Na fesootai talafou I nisi ole mamalu o Samoa ilea faaitu o loo fesoasoani atu I nai nei tagata faigaluega I le latou finau atu mo se fesoasoani ma o loo faatalia se faamatalaga mai ia I latou aemaise foi o le ofisa ole malo i Ausetalia mo se faamaninoga o le mataupu ma aiaiga sa aofia I lalo o nei konekarate faigaluega.
O se polofesa lagolago o mataupu tau aoaoga e aofia ai faiga faapologa modern slavery I le Iunivesite o Notre Dame o Matijn Boersma na ia taua ile lipoti e tele taimi e faauiga sese ai e tagata le upu modern slavery poo faiga faapologa ile taimi nei, peitai ina ua maea ona faafofoga le alii polofesa I le molimau a nai nei alii Samoa sa ia taua ai e iai mafuaaga tatau e talafeagai ai le faaaoga o lea faaupuga ile mataupu lenei.
I lalo o le faiga fou a le malo o Ausetalia mo galuega ia faavaitaimi le Pacific Australia Labour Mobility poo le PALM pei ona faapuupuu ai, ua taua o le a siliatu ona lelei ai le puipuiga o tagata faigaluega ma o le a maua ai foi le avanoa e mafai ai ona faigofie ona fetuunai le aufaigaluega e agai i nisi fale faigaluega ese. O lea fuafuaga fou faatoa amata I le masina o Aperila.
O le suesuega ale Senate I mataupu e faatatau I galuega lea ua folasia ai molimau a nai nei alii faigaluega Samoa ma isi foi mai le Pasefika ma ua suesue nei foi e le matagaluega o le va ifafo a Ausetalia lenei mataupu
Fai mai le faamatalaga a le alii o Talipope Kalolo pei ona faailoa ile SBS, e sili ai ia te ia ona toe foi I Samoa e faia nisi galuega poo se maumaga nai lo le tulaga o loo iai nei I Ausetalia.
