E avanoa le nofoaga o le Malaefatu Park o loo faafesaga’i ma le faletalimalo o le Tanoa Tusitala ma isi pisinisi o loo i Sogi i le aga’i i Mulinu’u, e aunoa ma se totogi.
Ua faailoa lautele lea tulaga e le Matāgaluega o Taaloga ma Alaga’oa mo le Fiafia o Tagata e ala mai i le ofisa sooupu o le malo, ina ua lipotia ai le totogi o le faaaogāina o falesamoa laiti e le’i leva ona fausia ai i lea nofoaga o loo i le itu i Sisifo o le maketi fou i Savalalo ma le maota o le Tooa Salamasina i Sogi.
Ua faailoa e le matāgaluega o le faaaogāina fua e aunoa ma se totogi o le nofoaga ma isi vaega o loo iai e pei o fale Samoa ma le vaega o loo tafafao ai fanauiti, o se tulaga tāua tele ina ia iai se nofoaga faapea e mālōlō iai tagata lautele i soo se taimi o le aso.
O le faailoa e se tagata faigaluega o lea matāgaluega o se totogi i le faaaogāina, o se sasi ma ua faamaualalo ai lea tagata faigaluega i se faamatalaga ua ia faia ae le’i faamaonia.
O se tasi lea o nofoaga e faaaogā e nisi o pisinisi laiti e faatau atu ai a latou oloa eseese i aso faailogaina e pei o le Aso Sa o Tamaiti, Aso Sa o Tinā ma le Aso Sa o Tamā e pei ona tapena iai le atunuu i lenei vaiaso.
O nisi foi o sauniga ma meafai a matāgaluega a le malo e masani ona faaaogā ai le nofoaga o le Malaefatu Park, o se ogaeleele tanu auā sa leai se nofoaga faapea sa iai i tausaga ua mavae.
