Ua laasia e le auaunaga a le Matāgaluega o Leoleo, Falepuipui ma le Toe Fuata’ina se isi matāti’a i lana tautua o le leoina ia malu tuaoi o le atunuu, i le tatalaina o lona ofisa fou i le malae vaalele faavaomalo i Faleolo.
Ua lē gata o le ofisa e tautuaina ai galuega o le puipuiga o lea tuaoi mai uta ma tagata malaga mai fafo, ae ua faaopoopo iai ma le tasi o auaunaga tāua mo le su’eina o nakoti poo fualaau faasāina e ala i le faaaogā o ta’ifau sosogi ua a’oa’oina lelei.
O le faigāpaaga a le malo o Samoa ma le malo o Ausetalia ua auala mai ai le fesoasoani ua faatuina ai lea ofisa i le malae vaalele faavaomalo o le atunuu o loo taunuu iai malaga mai atunuu eseese o le lalolagi.
O le tatalaina o lea ofisa i le Aso Lua o le vaiaso nei na faaleo ai le faafetai a le Minisita o le Matāgaluega o Leoleo, Falepuipui ma le Toe Fuataina le afioga i le Palemia, i le sui o le malo o Ausetalia ona e lē o muta le agalelei pea i le puipuiga malu o Samoa.
O se tasi o fesoasoani a Ausetalia ua tatala foi i le vaiaso nei, o se fale tele i Tuanaimato ua avea ma nofoaga faaleoleo e faatino ai galuega tau fesoota’iga ma isi auaunaga masani a le matāgaluega o loo faafoe i le ofisa autū i Apia.
Ua avea lea nofoaga e faasee iai galuega pe a iai nisi fuafuaga e faatino e le matāgaluega aemaise o le autū lava o se nofoaga e lagolago ai le tautua o loo faatino i le nofoaga tutotonu poo se backup warehouse.
