Ua amata faamamalu le siitaga fou o pasese o pasi ma taavale laiti la’upasese ina ua talia ai e le Kapeneta le 30 pasene o lea siitaga fou i le tuana’i o le 12 tausaga o le isi siitaga e 15 pasene.
Ua faailoa lautele ai le faamaonia e le Kapeneta o le siitaga o pasese o ia auala o femalagaa’iga i luga o le laueleele ina ua mae’a ai ona toe faasa’o nisi o faaletonu sa lāgā e nisi o le atunuu i se eseesega o le totogi o pasese mo nisi o nuu e muamua oo iai le pasi ma nuu e mulimuli taunuu iai i le motu o Upolu.
O le lisi o totogi o pasese mo le motu o Upolu i le vaega o taavale laiti o loo fua le tau o le pasese a le taxi mai le maketi i Fugalei ma le maketi i Savalalo i totonu o le taulaga o Apia ma aga’i atu ai i nuu ma afio’aga o itumalo uma o Upolu.
O le tau pito maualalo o le pasese i le taavale laitiiti i Upolu e $4 tālā 20 sene mo nisi o nuu i le lotoifale o le taulaga e pei o le alu i le afio’aga o Apia ma le aga’i i Mulinuu.
O le totogi pito maualuga o le taxi i Upolu e 135 tālā 80 sene, o le pasese lea o le taxi i le aga’i i Satitoa uta i Aleipata.
O le pasese maualalo i Upolu mo pasi pe a tuua le maketi i Fugalei ma le maketi i Savalalo e tasi le tālā 30 sene ma o le pasese maualalo lea i le li’o o nuu tu lata i le taulaga e aofia ai Malifa, Lalovaea, Leonē, ma le alu i Mulinuu, ae o le pasese o le pasi pito maualuga mo le motu lava o Upolu e 13 tālā 20 sene o le pasese lea o le pasi i le aga’i i Togitogiga.
O le totogi faapitoa mo le faaaogaina o se pasi i Upolu e 167 tālā 70 sene i le itula, ma e faapitoa le totogi lea i le faaaogā o se pasi mo se tafaoga poo se maliu.
I le tatou motu o Savaii o le uafu i Salelologa o loo amata fua ai le totogi o le siitaga fou o pasese o pasi ae o taavale laiti la’upasese o loo amata le fua o le tau fou o le pasese mai le molī faasinoala i le magafā i le taulaga i Salelologa.
O le pasese maualalo o le pasi i Savaii o le 70 sene ma le 80 sene ma e faasino tonu lea pasese i se vaega o le taulaga i Salelologa i le nofoaga o loo iai le lālā o le faletupe o le ANZ, o le maketi ma nuu o Sapulu ma Saloga.
Ae o le pasese pito maualuga o le pasi o le alu lea i le afio’aga o Auala pe a ui atu i le Itu o Tane e 15 tālā, ae a ui atu i Salega e 14 tālā 10 sene.
O le totogi faapitoa mo ni malaga e faaaogā ai se pasi i Savaii e 192 tālā 40 sene i le itula.
I malaga a taavale laiti poo taxi i Savaii o le pasese maualalo le totogi i le siitaga fou e 3 tālā 20 sene, o le pasese lea mai molī faasinoala aga’i i le lālā o le faletupe o le ANZ i Salelologa ae 4 tālā 50 sene pe a malaga i le uafu.
O le totogi maualuga o le taxi i Salafai lava e 207 tālā i le aga’i i A’opo pe a ui atu i Salega, ae 200 tālā 80 sene i le aga’i i Asau i le nofoaga o loo iai le pamu penisini pe a ui atu lava i Salega.
O le aso 31 o Iulai na amata faamamalu ai le siitaga fou o pasese o pasi ma taavale laiti la’upasese i Samoa.
