I le savalia ai nei o le 16 tausaga talu ona amata i Samoa le polokalame faitau tusi a le ofisa o le malo o Amerika i Apia le American Corner, o loo faafoe e le vasega o faia’oga Pisikoa mai lea malo, o le a’oga tulagalua a le afio’aga o Matāutu Falelatai ua muamua lagolago i le polokalame e pei ona sa asia e le Amepasa o lea malo le a’oga tulagalua i le vaiaso ua mavae, ma molimauina ai le tulaga o loo faafoe ai.
O se polokalame e maua ai tusi faitau e faaaogā e fanau e faaleleia ai le faitau tusi ma maua ai foi a’oa’oga i matāupu eseese o loo latou a’oa’oina i totonu o a’oga.
O se polokalame foi e mafai ona faaaogā e faaune atu ai tusi i fanau latou te faaaogā e pei ona faia i le faletusi faamanatu o Nelesoni i Apia, le nofoaga na amata ai lea polokalame i le tausaga e 2010.
O Mati o le tausaga nei na tatala ai le toe faafouina o le nofoaga o lea polokalame i le faletusi faamanatu o Nelesoni, a o le’i faalautele atu i tua e pei ona auai le a’oga tulagalua a le afio’aga o Matāutu i Falelatai.
O Salelologa i Savaii o loo iai foi le nofoaga mo lea lava polokalame auā fanau a’oa’oina o le tatou motu tele i Salafai.
