Ua molimauina i faasalalauga i luga o upega tafa’ilagi i lenei vaiaso le mae’a ai o le taimi galue o le afioga Aliioaiga Feturi Elisaia i le tofiga Komesina Maualuga o le malo o Samoa i totonu o le atunuu o Fiti, e pei ona faailoa ai e le ofisa o malo o atunuu o le Pasefika o loo i Suva le afea e lea sui o le tatou malo e faamavae atu iai, ina ua mae’a le silia i le lima tausaga sa ia tauaveina ai lea tofiga.
O le Afioga Aliioaiga Feturi Elisaia le ulua’i Komesina Maualuga o le tatou malo i lea atunuu na ulua’i tauaveina lea tofiga ina ua faatū ai le ofisa o le malo o Samoa i Fiti.
Ua faailoa ai e le faauluuluga o le ofisa tutotonu o malo o le Pasefika ia Baron Divavesi Waqa le faafetai i le sui o le malo o Samoa i lona sao tāua sa galulue soosootau’au ai ma lea ofisa o malo o le Pasefika.
E lē gata ina sa faamavae atu le sui o le malo o Samoa i lea auaunaga ae sa ia faamavae atu foi i le Pelesetene o Fiti o loo faaao iai lea malo tuaoi.
O Fepuari o le tausaga e 2021 na amata tauave ai e le Afioga Aliioaiga lea tofiga ina ua mae’a ni tausaga sa avea ai ma Amepasa o Samoa i totonu o Malo Aufaatasi i le aai o Niu Ioka i Amerika.
E tele tausaga sa galue ai lea tamālii i le Matāgaluega o le Va i Fafo o Samoa a o le’i filifilia e galue i ofisa o Samoa i atunuu i fafo.
O le avanoa ai o le tofiga Komesina Maualuga o Samoa i Fiti ua tālia ai nei se filifiliga a le malo o Samoa mo se tasi e tauaveina lea tofiga maualuga.
