Ua faailoa se faamatalaga mai se iuni e le o fiafia tausimai ile tulaga o loo iai nei feutanaiga mo tulaga tutusa I le faiga o totogi. Ua lipotia mai o sui o le Nurse Association sa faatulaga e palota mo se maliega ma le fono faatonu a falemai faaitumalo I le masina talu ai peitai sa le fiafia nisi ona e lei aofia ai ma le backpay sa o latou faatalitalia.
Ua faailoa e le Televise Tasi I le aso o le taimi nei ua palota le tusa ma le 40 afe o sui o le asosi lea ina ia ave loa le mataupu I le Employment Relations Authority poo le Pulega o Sootaga tau galuega
O le ofisa sili o le faalapotopotoga o tausimai, Paul Goulter ua ia taua I le Televise tasi o le a talosagaina foi le Authority ia faia mai sana faaiuga I nisi o faafitaulu ua aliae , pe o lava le siitaga o loo maua e sui sinia o le faalapotopotoga ma pe o le a le umi e tatau ona fai ma toe Iloilo ai le tulaga o totogi ia tutusa uma mo I latou e faatinoina le auaunaga.
O le 2018 na amata ai le finauga lea a tausimai mo tulaga tutusa I totogi aemaise ia faatalanoa le mataupu e faatatau I le totogi o tagata faigaluega I se aofaiga maualalo ane nai lo o latou totogi e tautau ona iai aemaise ona o le aufaigaluega e toatele ai le itupa o tamaitai.
