Tusia : Maina Misa Foma’i – Vai
O le asō, Aso Faraile, 22 Aperila 2022, na muta faafuase’i ai le mafutaga a Faimalomatumua Matthew Lemisio ma le Faamasinoga o Fanua ma Suafa ina ua faamaonia e le Faamasinoga Maualuga i lana faaiuga, e lē aloaia lona tofiga o le Sui Peresitene o le Faamasinoga o Fanua ma Suafa. O se ‘ava taumavae sa faia i le Fale Faamasino i Mulinuu ma se fiafia i le aoauli o le asō, e faamavae atu ai ia Faimalomatumua faapea Taueva Faafouina Mupo lea sa faatauto faatasi i laua e le Peresitene o le Faamasinoga o Fanua ma Suafa ia Fepuleai Atilla Ropati i nai masina ua tuanai atu.
O le vaiaso ua tuanai sa tuuina mai ai le faaiuga a le Faamasinoga Maualuga i le mataupu e faatatau i tofiga nei, sa faatautoina ai lē sa avea ma Komesina o Faigapalota a’o lei faamavae ai ma agai mai e fia avea ma Sui Peresitene o le Faamasinoga o Fanua ma Suafa.
I lana faaiuga na ta’ua ai e le Faamasinoga Maualuga e leai se malosiaga i le Peresitene poo Faamasino o le Faamasinoga o Fanua ma Suafa e faia ai ni tofiga. Na saunoa foi le Tamaitai Palemia i nisi o fonotaga ma tusitala, e lē aloaia tofiga sa faatautoina ma e lē taliaina foi e le Malo. Na faatautoina i laua ua taumavae ai nei ma le Faamasinoga o Fanua ma Suafa i le aso 17 o Tesema o le tausaga ua mavae.
