Ua pasia nei I le palemene o Niu Sila nisi tulafono fou o le a tuuina ai le malosiaga ile atunuu e faia ai nisi gaioiga faasaga ia Lusia ao faaauau ai pea ana osofaiga fai faamalosi ia Ukraine. Ole pili faaigoaina o le Russia Sanctions Bill ua pasia nei ina ua maea lona faitauga faatolu I le po anapo toeitiiti ta o le 10, ua malilie uma ai pati i lea suiga ile tulafono.

Sa faailoa e le tamaitai palemia Jacinda Adern ise taimi ua sola o le gaioiga lea o se taimi muamua lea ua faia ai ma o lona uiga o vaa ma vaafaila tetele o le a mafai ona taofia le toe ulufale mai ile atunuu ma o le a mafai foi ona faia loa ni sa poo sanctions I tulaga tau fefaatauaiga.

O lalo o ia sanctions pei ona faailoa o le a mafai ai e le malo ona taofia aseta o loo I totonu o Niu Sila ma o le a mafai ai foi ona taofia ai le feme’ia’I mai o aseta I totonu o Niu Sila pe faaaogaina foi le tulaga tau tupe o se avanoa e alofia ai sa ua tuuina e isi atunuu.

Ua folasia mai I le lipoti a le One News ile aso ua faamatuu mai ai e le malo ma le lisi o tagata e toa 100 o loo aofia ai ile osofaiga o Ukraine, ma o le a faia iai ni sa tau femalagaaiga, travel ban ma o le pito I luga o le lisi o loo iai le suafa o Vladimir Putin.