Ua toe maua fagu okesene mo le auaunaga masani a le maota gasegase o Tupua Tamasese Meaole i Motootua auā gasegase e mana’omia lea tulaga faapea ma le taimi e faia ai ni ta’otoga.
Ua faailoa e se tagata faigaluega o le maota gasegase i se lipoti a le leitio a Niu Sila o le po o le Aso Lulu na taunuu ai le vaaleoleo o le Nafanua mai sana malaga i Amerika Samoa na aumai ai se uta o fagu okesene ma ua tali a’i i nisi o galuega sa lē taunuu ona faatino e pei o ta’otoga ina ua lē lava fagu okesene i le maota gasegase.
E ui ua taunuu lea uta o fagu okesene mai Amerika Samoa ae ua faailoa e lea tagata faigaluega i lea lipoti e lē o lava.
O loo iai ni tulaga faaletonu o loo aafia ai masini o loo maua ai le ea o le okesene i le maota gasegase, o le māfua’aga lea o le tula’i mai o lea faaletonu ma o loo faia iai galuega mo le toe fo’ia o le faaletonu.
Mo le silafia sa tula’i mai foi faaletonu i le lē lava o fagu okesene i le maota gasegase i Motootua i ni tausaga e le’i mamao tele atu ona sa faaletonu masini e maua ai lea vaega tāua, ma sa tali mai foi le faigāmalo a Amerika Samoa i fagu okesene sa auina mai mo le auaunaga a le maota gasegase o Tupua Tamasese Meaole.
