Ua faapopoleina ma o loo nenefu pea fanau aoga o loo aotauina i le iunivesite a Massey i le fuafuaga a le iunivesite o le a vaea ai faiaoga i le vaega o le faainisia ma le faasaienisi.
O le vaiaso talu ai lea na faailoa mai ai e le iunivesite ua vaavaai e vaea tagata galulue mai mataupu nei ma o lala i Aukilani ma Palmerston North lea e aafia uma ai.
Ona o le a faaitiitia le augalulue o lona uiga o le a taofia ai foi ma courses o le engineering ma o le a tuufaatasi foi le school of natural sciences ma le school of food and advanced technology.
Mai fanau aoga o loo aveina nei mataupu ma aafia i le suiga ua lē mautonu ai nei ma ua lagona ai foi le lē fiafia.
Ua lipotia e le Stuff o le Aso Lulu o le vaiaso talu ai lea na fono ai le aufaigaluega, ae mai fanau aoga o loo tuufesili pea ma nenefu, e lē faigofie o lea ua lata i suega ma ua uma foi ona faatulaga fuafuaga o le tausaga faaleaoaoga e 2024.
O le asō o loo faia ai se talanoaga a fanau aoga o loo aafia ma le faaulu o le school of food and advanced technology.
