E ui i le iai o le atunuu i lenei vaitau mālūlū, ae o loo maitauina lava le aafia o nisi o nofoaga ma aafiaga o le sasao malosi o le afi i le vaomatua, i Wānaka i le aai o Albert poo Albert Town i le faai’uga o le vaiaso talu ai.
I ripoti mai le leitio faavaomalo a Niu Sila na mafai ona taofi e sui o le tinemū le soona sasao tele atu o le mū i le aai atoa.
Faamauina e oo atu i le 22 aiga na faanatinati ona aga’i ese mai o latou fale, ona o le tulaga o le saogalemū i le oo atu o le afi i o latou faaitu.
Ta’ua e le Tineimū ma Faalavelave Tutupu Faafuase’i poo le Fire and Emergency New Zealand, o le malolosi tele o matagi ma tulaga o laufanua lea na tau faafaigatā ai ona tapē le mū.
Māua na amata sasao lenei afi poo le 7:30 o le afiafi o le Aso Toona’i, ma na maitauina le vave ona sosolo atu o le afi, pe tusa ma le 1 kilomita le mamao na oo atu o le sosolo o le afi, ma faatama’ia ai le tele o laau ma vaomatua, tu lalata ane i nofoaga, o maota ma laoa a tagata lautele.
Ta’ua le galulue malosi o le tineimū mai itu uma o le nofoaga na sasao ai le afi auā le tau tuuitiitia o itu e faaleagaina e le afi.
E le’i faamautūina mai le māfua’aga, poo fea foi na amata mai ai lea afi, e le’i toe faailoa mai foi se taimi e toe foi ane ai tagata na aga’i ese mai i o latou fale.
Puna o Faamatalaga: https://www.rnz.co.nz/news/emergencies_local/1080263/strong-winds-hampering-firefighters-at-large-wanaka-blaze
