O le Aso Gafua o le vaiaso nei le aso 24 o Aokuso na atoa iai le 196 tausaga talu ona taunuu i Samoa i le afio’aga o Sapapalii le ulua’i lotu Kerisiano na aumai e Ioane Viliamu ma sui o le Sosaiete o Misionare Lonetona le L.M.S. poo le London Missionary Society.

O le tausaga e 1830 na taunuu ai le lotu, ae o le tausaga e 1909 na amata ai le lotu o le Taeao Fou a le afio’aga o Sapapalii e faamanatu ai le taeao fou o Samoa i Mataniufeagaimaleata na suluia ai i ‘ave o le malamalama o le Talalelei.

Advertisement

O le Aso Gafua na faatino ai le sauniga lotu o le taeao fou i le malumalu o le Ekalesia Faapotopotoga Kerisiano Samoa i Sapapalii sa auai le susuga i le Nofo, Susuga Malietoa Molī ma nisi o lona aiga, aemaise o alo ma fanau a le afio’aga e lē gata ia i latou o loo alaala i le nuu ae faapea ana tamafanau o taulaga tagata o loo ‘aitaumalele i le galuega a le Atua faapea tamafanau a le afio’aga o loo aumau i atunuu i fafo.

Malietoa Moli i Sapapalii. Photo: supplied

Le susuga i le A’oa’o Fesoasoani o se matai o le nuu ma le ekalesia EFKS i Sapapalii susuga Li’o Tofa Foleni.

O le malelega mai le Nofo sa fofogaina i le sauniga e se tasi o A’oa’o Fesoasoani o le Ekalesia, susuga Papalii Li’o Ta’eu Masipa’u.

O faasalaauga tuusa’o a le L&L Captures na molimauina ai le sauniga lotu faamanatu o le taeao fou.

I tala famaumau o le lotu tausi a le afio’aga i tausaga ta’itasi, ua 19 faife’au e aofia ai misionare o le LMS sa galulue i le tausiga o le aulotu.

Sa galulue ai foi ni misionare mai atunuu o Tahiti ma le Atu Kuki i le tau amataga mai o le lotu, ae o le tausaga na te’a nei na tatala ai le feagaiga a le Ekalesia ma le susuga i le faife’au o Esera Auatama ma le faletua o Tamara ina ua mālōlō penisione.

O le Aso Faraile nei e osi feagaiga ai le ekalesia EFKS i Sapapalii ma le susuga i le faife’au ia Melepone Isara ma lona faletua, ua luasefulu iai faife’au ua galulue i le aulotu.

O le susuga Melepone sa galue i le ekalesia aoao i le tofiga teutupe a o le’i valaauina e le afio’aga o Sapapalii e tausia le ekalesia.

O le aao māfola o tamafanau a le nuu i le latou taulaga masani o le lotu o le taeao fou o lenei tausaga e $79,750 tālā.

Na faatino e le afio’aga faaaloaloga i se sua faatupu i le afio atu o le Nofo e auai i le lotu o le Taeao Fou, susuga Malietoa Molī Malietoa.