I le sefululua tausaga talu ona amata le ti’eti’ega uila vilivae le Tour of Samoa e taamilo i motu o Upolu ma Savaii, o le faai’uina o lea faamoemoe sa taualuga i Salafai, ua sola ai le ‘au ti’eti’e uila vilivae a Samoa ma le siamupini.
O le alii o Jet Lee Curteis mai Samoa ua manumalo ai i le vaega o tagata ti’eti’e uila ta’ito’atasi ma o ia foi sa ta’imua i le ‘au ti’eti’e uila e 25 a Samoa.
O le tuaa tinā o Jet e mai Letava ma Solosolo ma o le avea ai ma ulua’i Samoa ua siamupini i le tuuga ti’eti’e uila vilivae.
I le vaega o tama’ita’i ua sola le tama’ita’i o Summer Karras mai Kalaiesetete Niu Sila ma le siamupini i le vaega o tama’ita’i.
O le mae’a ai o lea faamoemoe ua faaalia ai i se pepa faalauiloa, o se tasi lea o taaloga ua avea ma faatosina lelei mo Samoa i le atina’e o tagata tafafao auā e malaga mai ai tagata e fiafia i le tuuga ti’eti’e uila vilivae e faaaogā lea avanoa e maimoa ai i laufanua lafulemu ma lanulau’ava o le atunuu aemaise o le si’osi’omaga faalenatura i laau ma le sami lanumoana.
O alii ti’eti’e uila vilivae mai Niu Sila na ausia le tulaga lua ma le tulaga tolu, ae o se sui tama’ita’i o le ‘au a Samoa na tulaga tolu i le vaega o tama’ita’i ae tulagalua se tama’ita’i mai Niu Sila.
E toe faatino foi lea tuuga i le tausaga fou.
