E silia ma le 70 taavale ua taofia pe ua aveesea foi; o se gaioiga tele lea a le Malo o loo faatino ina ia sa’ili ai tagata o loo faafaigatā pea ona aga’i atu e totogi sala o a latou taavale i le faamasinoga. 

Ta’ua e oo i le 38 tagata faigaluega o le faamasinoga na aga’i atu i tua i aai o Aukilani, Ueligitone, Kalaiesetete, Tauranga, Hamilton, Palmerston North, Hastings, Napier ma Taupō e faatino le galuega o le sa’ili o taavale e faaaogā ai masini faaneionapo; o le (automatic number plate recognition technology) o loo faamauina e le’i totogiina sala poo nisi o aitalafu e le’i totogiina lava. 

Advertisement

E silia ma le 9,000 numera o taavale poo number na siakiina, ma e 224 tagata na maua o loo iai a latou sala tupe poo ni tupe e tatau ona totogi atu i le faamasinoga. 

E 11 taavale na aveese, 64 na loka ma taofia, ae 113 tagata na tuuina atu i ai lapata’iga. 

E 36 tagata na totogi a latou sala tupe i le aso lava lea na aga’i atu ai le aufaigaluega, ma e silia ma le $34,000 na mafai ona aoina. 

Ta’ua e le alii Minisita o Faamasinoga, Paul Goldsmith, e tasi lava le fe’au o loo taumafai e molimoli atu i le lautele, o tagata o loo iai aitalafu i le faamasinoga, e tatau ona totogi ia sala ma aitalafu, a leai o le a vaaia le loka poo le aveesea ai o lau taavale.

Puna o Faamatalaga: https://www.rnz.co.nz/news/crime-and-justice/1081406/court-fines-clampdown-more-than-70-vehicles-clamped-seized-in-a-single-day