O le masina o Mati o le tausaga nei i le aso 24 na avanoa ai le nofoa o le itumalo palota o Falealili 1 ina ua faamaonia le moliaga e tasi o faiga faaālatua sa molia ai lē sa sē’ei i le tofi faipule ma sa filifilia mai i le palota tele ia Aokuso o le tausaga ua mavae.
O le Aso Gafua o lenei vaiaso ua atoa ai le lima masina talu ona avanoa le nofoa o lea itumalo palota.
E faapena foi le itumalo palota o Vaimauga 3, o Mati o le tausaga nei na faamavae ai lē sa sē’ei i le nofoa o le itumalo ina ua suia lana lagolago mai le patī faaupufai o loo agaia le malo i le vaega faaupufai o loo tu nei i le foe o le pulea o le malo.
O le palota laitiiti a Vaimauga 3 na faia ma aumai le faai’uga i le masina o Me na toe lu’i i se tagi tau palota i moliaga o faiga faaālatua ma faamaonia uma ai moliaga o lē sa filifilia mai le palota laitiiti ma lē sa toe tauva ai sa filifilia e Vaimauga 3 i le palota tele ia Aokuso o le tausaga na te’a nei.
O le avanoa ai o nofoa o ia itumao palota o le a toe sa’ili ai ni sui usufono o Vaimauga 3 ma Falealili 1 i le Palemene i le faigāpalota laitiiti ua atofaina e faia i le aso 18 o le masina fou o Setema, ma le fuafuaga e oo atu i le Aso Gafua 21 o le masina lava o Setema ua faamaonia ni sui usufono mo nofoa o ia itumalo.
O le faai’uga o le vaiaso ua mavae na faailoa ai e le ofisa o le komisi o faigāpalota lana tapenaga mo ia faigāpalota laiti e lua.
O le Aso Faraile o le vaiaso nei e tatala ai le avanoa mo le faauluina o sui faatutū mo ia faigā filifiliga, ae Aso Faraile o le vaiaso a sau le aso 4 o Setema, e tapunia ai le toe faauiina i tua o se suafa o se sui tauva.
O le Aso Lulu 16 o Setema o le palota muamua poo le pre-polling ae aso 18 o Setema e faatino ai palota laiti a Vaimauga 3 ma Falealili 1.
O le Aso Gafua 21 o Setema lava e toe faafoi ai faasalalauga o ia palota laiti e lua, lea e faamaonia ai e le afioga i le Ao Mamalu o le Malo sui tauva o le a filifilia mo nofoa o ia itumalo faapalota.
