O le afioga To’alepai Eronny Mareko o se alo o Samoa mai Ausetalia o loo avea ma konesale o le faalapotopotoga tau taaloga o le Sapatea Sports Hub, sa malaga mai i le atunuu ma sana aumalaga e fesoasoani i le atina’e o taaloga ma faia ai ni polokalame sa afea ai nisi o nuu ma afio’aga, faapea ai ma le itumalo palota o Palauli 1.

O le tāua o le fesoasoani a lea tamafanau a Samoa ma lana aumalaga ua faafetaia ai e le tama’ita’i Sui Palemia o le faipule o Palauli 1 poo Palauli i Sisifo le afioga Mulipola Anarosa Ale Molioo ina ua talimalo le Sui Palemia i le aumalaga a o le’i toe tuuvaa ese ma Samoa.

Advertisement

I se pepa faalauiloa o loo faailoa ai o le asiasiga a le Return to Paradise Mission sa ta’ita’i mai e le afioga To’alepai Eronny Mareko mai le Sapatea Sports Hub ua avea ma faata’ita’iga lelei o le malosi o faigāpa’aga ma fanau a Samoa o aumau ma faamautū i atunuu i fafo mo le atina’eina o tupulaga talavou a Samoa i le itu i taaloga, a’oa’oga ma galuega e una’ia ai le atina’e o nuu ma afio’aga.

Na faaalia e le Sui Palemia i lana faafetai i ia alo o le atunuu o le mafutaga mauaa i le va o Samoa ma ana tamafanau i atunuu i fafo o se tasi lea o aseta sili ona tāua mo le tatou atunuu.

O le lagolago o le Sapatea Sports Hub sa tauala i se polokalame sa taulamua ai le pulega o tagata tafafao mai fafo ma le Matāgaluega o Aiga ma Aga Fesoota’i.