Ua mautū fausaga amata o le sauni atu o le atunuu e molimauina polokalame o le vaiaso o Measina i le vaiaso muamua o Setema lea e amatalia i le Aso Sa o le vaiaso nei, e pei ona faailoa ai tama’ita’i e to’avalu o le a sa’ili ai se Tausala o Samoa.
O tama’ita’i ua faailoa lautele o latou ata ua aofia ai le Tausala Samoa mai le setete o Niu Sa Uelese i Ausetalia ma le Tausala Samoa mai le setete o Hawaii i Amerika.
O tama’ita’i o le a tauva ua aofia ai Caroline Geraldine Mala’itai, Dilimoa Untat Tusani, Faatafaoitafamamaotalitalilauipupafuti Levania Meredre Barbara Toiaivao, Hope Faith Kaumatule mai Hawaii, Laurissa Maria Bona Baker, Lotonuu Tologatā Taumaloto, Mille Rhonda Samuelu, Tausala Samoa mai Niu Sa Uelese, ma Poumau Astesclanalesusi Ah Lam Tiufea Va’a.
O le tama’ita’i o le a manumalo o le ulua’i Tausala lea o Samoa o le vaiaso o Measina e pei ona suia iai le Teuila, ma o le a fai ma sui o le atunuu i le tauvaga e sa’ili ai se Tausala o le Pasefika.
O le kamupani telefoni o le Digicel o loo faaauau pea lana lagolago autū i le tauvaga e sa’ili ai se Tausala o Samoa, lea ua faaauau ai foi ma le tauaveina e le Anofale Productions o tapenaga o lea tauvaga.
