Ua amata tuli le faasalaga e sefulu tausaga i le falepuipui o se alii talavou 22 tausaga le matua, ina ua faamaonia ona moliaga i solitulafono o le faiaiga faamalosi, ave faamalosi o se teineitiiti 17 tausaga le matua, ma le solitulafono o le faaoolima matagā.

O moliaga uma nei e māfua mai ina ua ave faamalosi e lē ua molia i lana taavale lē na aafia e aunoa ma le loto malie iai o le teineitiiti.

Advertisement

O Leauvaa i le taeao o le aso 7 o Oketopa o le tausaga e 2024 na piki ai e lē ua faasalaina lē na aafia i lana taavale a o aga’i le teineitiiti e faatau i se faleoloa.

Sa fesili lē ua nofosala i le teineitiiti pe mafai ona la o e faasino atu le fale o se tagata sa ia fia maua.

Sa mau lē ua molia i le lima o lē na aafia ma toso atu i totonu o le taavale.

Na ave ai lē na aafia i se fale i Faleatiu ma faia iai gaioiga na māfua ai ona molia e leoleo le taulealea.

O loo faaalia i le faai’uga tusitusia a le Faamasinoga Maualuga e lē masani lē na aafia ma lē ua molia, o se tulaga sa teena e le alii talavou ua tuli nei lona faasalaga i le falepuipui i Tanumalala.

Sa iloiloina lea tulaga e le laulau o faatonu na iloiloina molimau ma o latou talia ai le mau a lē na aafia, e lē masani ma e lē iloa e le teineitiiti lē ua molia.

Ua taofia e le faamasinoga le faailoaina o suafa ma nuu o le alii talavou sa faasala i le sefulu tausaga i le falepuipui ma le teineitiiti na aafia.