O loo iloilo e Leoleo ni moliaga faatatau i se matāupu na osofa’ia ma faaoomanu’a tugā ai e nisi o tupulaga talavou o ni teine talavou se to’alua i North Shore.
Faamauina i ripoti mai le leitio faavaomalo a Niu Sila, le RNZ, na tula’i mai le faalavelave mata’utia i Takapuna pe tusa o le 9:30 i le po o le Aso Toona’i o le vaiaso talu ai.
Ta’ua e leoleo, na taumafai ia tupulaga e aveese le isi tama’ita’i mai le isi, ina ia valavala itu e iai i la’ua ma faatino loa le soligatulafono o le faaoolima poo le faaoomanu’a tūga ma gaoi a la meatotino.
Ua faailoa mai e leoleo ua maua nei le to’atele o talavou na aafia i le matāupu, ma e faapea e mai le va o le 12 aga’i i le 17 tausaga le matutua o i latou nei.
Ta’ua na mafai lava ona fesoasoani ia mafine e to’alua i le galuega sa’ili, ma faailo nisi o tagata o loo masalomia le aafia i lea matāupu, na maua atu i se fale faatali pasi.
Faamanino mai e le Satini Sinia, o se alii leoleo su’esu’e faapitoa, Detective Senior Sergeant Mike Williams, o loo faaauau pea su’esu’ega a le auaunaga ma o loo faatino iloiloga i moliaga e tatau ona molia ai i latou o loo aafia i lenei matāupu.
Puna o Faamatalaga: https://www.rnz.co.nz/news/crime-and-justice/1096819/police-consider-charges-after-violent-north-shore-group-attack-on-teen-girls
