Fai mai o nai tamaitai e toafa o backpackers ua lipotia ua maliliu mai le tuaoi o Kuiniselani ma Niu Sau Uelese, faatoa foi ane mai le latou galuega I luga o se faatoaga ae tupu loa le faalavelave na aafia ai.

Lipotia ele 7News o nai tamaitai ia e toafa e mai Kolea mae nao ni nai vaiaso talu ona taunuu mai I Ausetalia. Fai mai le lipoti na faimalaga ane ise taavale o le Honda CRV ae talitonuina e lei tuuavanoa ao agai ane I le highway ma sosoa ai le latou taavale e se semi trailer na malaga ane mai le itu I matu, maliliu uma ai le toafa.

Ile taimi ole faalavelave o loo taua sa mamafa ai timuga ae o muai suesuega ua faia e foliga mai e lei giveway le latou taavale I le loli ma tupu ai loa le faalavelave. O le aveloli na auina atu I le falemai mo togafitiga ao loo manuia.

O loo faia suesuega I le faalavelave ae faamanatu mai leoleo I avetaavale ia mataitu tulaga o le tau ma le auala ao feagai foi ma femalagaaiga ile aga atu ile faamanatuina o le Eseta.