Ua aumai i se tulaga faalaua’itele se valaau a le faalapotopotoga o le Toomaga mo ē Puapuagatia mo le tatou atunuu, ia tuu le avanoa i fanau e ola ai, ae lē o le lafoa’i o le oloa tāua a le Atua.

O le valaau mai lea faalapotopotoga o se tasi o ana auaunaga autū o le puipuiamalu o le ola o fanauiti, ona o le faalavelave ua fano ai le ola o se masaga pepe ina ua lafoa’i e le tinā na fanauina.

O lea faalavelave e pei ona molia ai e leoleo le tinā o le masaga pepe i le solitulafono o le fasioti tagata pa’ivalea ma le moliaga o le fanau lafoa’i le oloa tāua, ua lagona ai e le Toomaga le faanoanoa, ma toe faailoa ai le tasi o ana auaunaga o le ofoina o fautuaga i se tamaitai ua ma’ito ae ua lē mautonu lona mafaufau ona o ni mafatiaga o feagai ma ia e fesoota’i i lona ma’itaga.

Ua fautauina ai foi le atunuu ia tuu atu le fanau e tausia ma vaaia e le Toomaga pe a o iai ni faafitauli e ono lamatia ai le tausiga lelei o le fanau.

Ua toe faailoa ai foi e le faalapotopotoga e avea o se faamanatu tāua le avea ai o Samoa ma se tasi o atunuu o le lalolagi ua na talia le feagaiga e faatāua ai le aiātatau o fanau.

O le tulafono faavae foi a lo tatou malo o loo aiaia ai le tāua o le ola e tatau ona maua e soo se tagatānuu o Samoa.