O le umi o pē le eletise i le motu atoa o Upolu mai le afiafi ua tagi alisi o le Aso Faraile ua mavae, ae faato’ā ola i le te’a o le 12 i le po, na māfua ona o sooga o uaea malolosi e fesoota’i atu ai i le afi numera 2 o loo i le faleafi eletise i Fiaga.
Ua faailoa lea māfua’aga e le pulega o le faalapotopotoga o le malosi tau eletise ma le faamatalaga o loo faaauau pea galuega e taofia ai le toe tulai mai o se isi faaletonu e toe pogisa atoa ai le motu o Upolu.
O se faaletonu na tuta’ia ai fuafuaga masani o le amataga o le faai’uga o le vaiaso e pei o le pogisa o fale e faia ai taaloga bingo, vave ona tapunipuni ai nisi o faleoloa tetele supamaketi, ae sa lē taunuu ai ma nisi o fuafuaga sa faatulaga mo lea afiafi.
I le pepa o faasalalauga mai le malosi faaeletise ua faailoa ai o le afi i Fiaga o le ogatotonugalemu lea o fesoota’iga uma tau eletise mo Upolu atoa e aofia ai ma fesoota’iga faatekonolosi tau eletise.
O le nofoaga foi lea e ofaga uma iai le tulaga tau saogalemu o le faasoasoaina o le eletise mo Upolu.
Ua momoli atu ai le faamālūlūga a le faalapotopotoga i aiga uma, ma pisinisi aemaise o isi auaunaga na aafia ona o lea faaletonu.
E pei ona silafia o faaletonu ogaoga sa aafia ai lea auaunaga i le masina o Mati e oo ia Aperila o le tausaga na te’a nei na totogi atu ai e le malo se taui mo meatotino a aiga ma pisinisi sa faaleagaina.
O se taui na faaalu ai e le malo se tupe e tusa ma le tasi tesimale iva miliona tālā.
