I le tuana’i o le lima masina talu ona faaumatia e le malaia poo le afi i le masina o Fepuari o le tausaga nei le faleoloa tele, le Hypermarket a le kamupanī a Frankies o loo i Vaitele, o le tau faai’ui’uga o le masina ua mavae atu nei o Iulai na faamautū ai le maua e lea kamupanī o le faamanuiaga tau tupe e 11 miliona o le inisiua o le fale atoa mai le kamupanī inisiua o le Federal Pacific Insurance.
O le pule o lea kamupanī le tofa Namulauulu Sami Leota na sainia ma le alii pule ia Franky Cai le tuuina atu o lea faamanuiaga tupe o le inisiua.
O le tausaga e 2016 na tatala ai le faleoloa tele hypermarket o Frankies i Vaitele ma avea ai o se tasi o nofoaga e tumutumu iai le atunuu mo faatauga, peita’i o le mu i le masina o Fepuari o le tausaga nei na faamuta ai le auaunaga a lea faleoloa tele o le kamupanī a Frankies.
O se tasi o nofoaga o lea kamupanī i Vaitele tai lava sa toe tatala i ni masina e le’i mamao atu ma faaauau ai le supamaketi i le taimi nei.
