I se su’esu’ega a tagata faigaluega o galuega lautele poo social workers, ua latou faailoa ai ona o le taugatā tele o le soifuaga ua iai nei, e iai fanau mai Aukilani i Saute aemaise le aga’i atu i nuu i tua ua lē mafai ona auai i a’oga ona ua lē gafatia e mātua le tau o le suāuu ma penisini o taavale e momoli ai fanau i a’oga.
Ta’ua e le tasi o social worker, ia Eloise Jowitt, e to’atele fanau a’oga e fai sina maomao o le auala pe afai ae savavali fanau a’oga i le falea’oga, ma ua taugatā lava siitaga ua iai i le suāuu ma le penisini ua lē gafatia e mātua ma aiga le momoli o fanau i le a’oga i aso ta’itasi.
Faaopoopo Eloise, o loo iai lava le faanaunauga i fanau e auai atu i a’oga peita’i ua avea tulaga o auala o femalagaa’iga ma papuipui i lenei vaitau.
Na ia faailoa foi, o le tele o aiga ua lē gafatia le tau o mea’ai taumafa, eletise ma lavalava poo ofu māfanafana o le tau mālūlū.
O nisi fanau e oo atu i le a’oga e aunoa ma ni seevae, ofu timu, ae o nisi o aiga e momoe faatasi i le potu e tasi ina ia maua sina māfanafana.
Ua faailoa e le Presbyterian Support Northern ua faatupula’ia le numera o talosaga mo fesoasoani ua oo atu.
Faamauina e le Matāgaluega o Aga Fesoota’i ua silia ma le 218,500 tagata o loo maua fesoasoani tau seleni poo penefiti, o i latou o loo tau sa’ilia pea ni galuega, ma ua tele foi fesoasoani mo mea’ai taumafa e tuuina atu i tagata.
Ua talosagaina ai le malo ina ia faaauau pea fesoasoani mo aiga o loo mafatia i le taugatā o le soifuaga.
Puna o Faamatalaga: https://www.nzherald.co.nz/nz/children-missing-school-because-parents-cant-afford-fuel-social-worker-says/CCUTEIS43JF27B5RIP5DOAUVJ4/
