Ua amata nei le faamasinoga o le alii o Tiedan Huo i luma o le Faamasinoga Faaitumalo i Manukau, o loo molia i le faia o ni gaioiga taufaamata’u, e faapea o le a ia osofa’ia ai ni a’oga se lua i totonu o Aukilani.
Na faailoa e le itu o leoleo, o loo tuua’ia lea alii i lona tuuina atu o se faamatalaga tusitusia poo se “manifesto” i le a’oga maualuga a Waiuku i le masina o Mati o le tausaga ua mavae, lea sa ia lapata’ia ai fanau a’oga ma faia’oga ina ia aua ne’i aga’i atu i le falea’oga.
O lea faamatalaga tusitusia na ia faamatala ona lagona tigā ona o le sauāina o ia e faia’oga ma le lē amana’ia o ia e leoleo, vaai maualalo ma le faailoga tagata ona o ia o se tagata Saina.
Na faailoa fo’i i le tusi ni fuafuaga o lona faaaogā ai o ni fana ua ta’ua o 3D-printed firearms, pulufana mo ni ‘au’upega o ututau, ma pomu e osofa’i ai le Waiuku College ma le Rutherford College.
Na faailoa foi le aga’i o lona ma’ema’eā i le ofisa o leoleo i Pukekohe ma Te Atatū ma nisi o ofisa o le Palemene.
I ripoti mai le leitio faavaomalo o loo faamauina ai, i le faatautaiga o su’esu’ega a leoleo o lea na o latou maua ai o ni ‘au’upeaga eseese i nofoaga ma fale e fesoota’i atu i lea alii e aofia ai se laaumalosi loaded pump-action shotgun, o pulufana, ma mea e faaaogā i pomu ma mea faapāpā, faapea ni faamaumauga tau faatupu faalavelave.
O loo teena e lē ua molia ona moliaga uma e aofia ai le moliaga o le taufaamata’u e faaoo le oti, o lona umia ai faasolitulafono o ‘au’upega (laaumalosi ma pomu), ma lona umiaina o faamaumauga e atagia ai gaioiga faatupu faalavelave.
Ua faamauina o loo faamoemoe e faaauau le faamasinoga mo le isi 2 vaiaso.
Puna o Faamatalaga: https://www.rnz.co.nz/news/crime-and-justice/820341/man-accused-of-threatening-to-carry-out-attacks-on-two-auckland-schools?fbclid=IwY2xjawTWDyhleHRuA2FlbQIxMABicmlkETFTNDNZOGczUTVGZVF4ZDRlc3J0YwZhcHBfaWQQMjIyMDM5MTc4ODIwMDg5MgABHta2xMH4Mq5Un2XilCTajKTa1WkMFhxRwXKo1L7e6hCg5FYnkQUvmqAkkieM_aem_FQqq8kRkxuVmz1B7iwwx4g
