E na o le 13 tausaga le matua o se tamaitiiti ua uma lona ola ma pu’eina foi nisi pasese e to’atolu o ni talavou ina ua lavea se taavale e lata i Newcastle i le taeao analeila.
Fai mai le 9News o le tamaitiiti na malaga atu i le taavale o le ituaiga o le Toyota Kluger e talitonuina na gaoia mai le itu i Saute o Newcastle.
O le vaveao analeila na tupu ai le faalavelave ina ua see ese le taavale mai le auala e lata i Lake Macquarie.
Na faia togafitiga i le tamaitiiti i le nofoaga na tupu ai le faalavelave peita’i mulimuli ane na uma lava lona ola.
O le isi tamaitiiti e 14 tausaga lona matua sa i totonu foi o le taavale, na pu’eina e leoleo ma ave i le falema’i mo togafitiga.
O le isi to’alua sa iai foi i totonu o le taavale na sosola ese mai le vaega na tupu ai le faalavelave.
E le’i iai ni moliaga ua faia ae o loo faaauau su’esu’ega.
Puna o Faamatalaga: https://www.nine.com.au/australia-news/nsw/boy-13-dead-after-stolen-car-crashes-near-newcastle-gateshead-20260803-p60ku8.html
