E to’alua ni tagata na maliliu i le faai’uga o le vaiaso le Aso Toona’i ma le Aso Sa muamua o Aokuso o loo faia iai su’esu’ega a leoleo i le māfua’aga.
Ua faailoa e leoleo le taofia ai nei o se tamā e 66 tausaga o le soifua mo su’esu’ega i le maliu o se alii talavou e 20 tausaga le matua, ae aafia i ni manu’a se isi taulealea e 21 tausaga le matua.
O loo masalomia sa faaaogā ai se laau malosi lea ua taofia e leoleo le ‘au’upega mo su’esu’ega atili i le pogai o le faalavelave na tula’i mai i Vaitele i le taeao o le Aso Sa.
O le tasi o maliu o se tama taalo lakapi ma o se laufalī foi lea ua faailoa e leoleo o se taaloga lakapi sa faia i le malaetaalo o le afio’aga o Vaiala na fano ai le soifua o lea tama taalo.
Ua ave ai nei le talosaga a le matāgaluega o leoleo, falepuipui ma le toe fuata’ina i le atunuu aemaise ia i latou sa iai i le taimi o le taaloga, ina ia tuuina atu ni ata video sa latou pu’eina mai le taaloga na auai ma lē ua maliu.
O ia ata video ma ni faamatalaga o le a fesoasoani i su’esu’ega a leoleo o loo faagasolo.
