Ua tuuina atu le tali tetee a Alapati Ropeti i moliaga uma a leoleo e aofia ai le fasioti tagata faamoemoeina ma le fasioti tagata pa’ivalea, ae ua tolopō i le aso 17 o Aokuso ni tali a Lui Lui ma Vincent Esera se’i silasila muamua a la loia i faamaumauga a leoleo.
O i latou uma ia e to’atolu o loo tuua’ia i le maliu o se taulealea i le nofoaga o loo iai le pisinisi mo tafaoga le Taumeasina Hideaway i le lua vaiaso ua mavae.
O le Aso Gafua na toe valaau ai moliaga o Alapati, Lui ma Vincent lea ua tatala i tua i ni aiaiga e faatali ai se aso e valaau ai molimau a leoleo i moliaga ua tuua’ia uma ai i latou.
O le valaauga i le aso 17 o le masina nei e tatau ona faamautū ai se aso e su’esu’eina ai moliaga o le fasioti tagata faamoemoeina, fasioti tagata pa’ivalea ma le faaoolima.
