Ua lu’i e le faipule filifilia o Safata 2 le afioga Tuia Fuatogi Pu’a Letoa e ala i lana loia, se vaega o le tagi tau palota ua molia ai i ni tuua’iga o faiga faaālatua e fesoota’i i tupe o le taui e 10 miliona tālā.
O le valaauina o le tagi i le Aso Faraile ua mavae na faailoa ai e le loia a le faipule le tuuina atu o le talosaga e taofia ai ona faaauau se vaega o ia moliaga, ma ua faatulaga ai le Aso Lua o le vaiaso a sau, aso 11 o Aokuso e tuuina atu ai finauga a le loia ma tali iai le loia a le itu ua faauluina le tagi tau palota.
A maua se faai’uga o lea finauga ona faato’ā iloa ai lea o le aso e valaau ai mau o le tagi tau palota.
O le tama’ita’i loia le afioga Magele Leone Ma’ilo o loo finauina le tagi ae o le tama’ita’i loia o Miruel Lui mo le faipule filifilia a Safata 2.
