Ua faamautū i se faai’uga a le Kapeneta i lenei vaiaso e pei ona faailoa e le ofisa sooupu o le malo le filifilia o nisi o tamalii se to’atolu latou te tauave tofiga Ofisa Sili mo nisi o auaunaga ma tautua a le Malo.
O le Faletupe o Atina’e ua avea ma Ofisa Sili o pulega le afioga Tamalēta Taimang Jensen.
O le Faalapotopotoga o Vaa a Samoa ua filifilia e avea ma faauluuluga le afioga Tauiliili Vaelua Sonny Brown.
O le Pulega o Atina’e o Itumalo ua avea ma ulua’i Ofisa Sili o lea auaunaga fou a le malo le tofa Unasa Viane Faifuaina Toala.
O ia tamalii ua latou umia faailoga maualuluga mai iunivesite ma a’oga sa a’oa’oina ai, ma o le taimi muamua lenei ua seei ai i tofiga Ofisa Sili ma e tolu tausaga le umi o a latou konekarate.
