Ua faailoa ai nei e le Pulega o Tagata Tafafao mai i Samoa, o se tasi o auaunaga a le malo sa feagai ma le tapenaina o polokalame o le vaiaso o le Teuila i le 34 tausaga ua mavae, le amata aloa’ia i le tausaga nei o le faaaliga ua faaigoaina o le Measina Festival e sui a’i le Teuila.
O se suiga fou o le a faaauau ai pea polokalame masani o siva ma pese faaleaganuu ma isi tapenaga ua masani ai, ae ua faaopoopo iai ma le polokalame a le Matāgaluega o A’oga ma Aganuu lea e autū lava i le faaolaolaina o tu ma aganuu, le Samoa Ne’i Galo.
O se polokalame e auai a’oga maualuluga i le atunuu e faailoa ai i se tulaga faatauvaga siva ma pese faaleaganuu ma tala faakoneseti e faatatau i talatuu o Samoa.
O le aso 30 o le masina nei o Aokuso e amata ai polokalame o le vaiaso o Measina ae mae’a i le aso 5 o le masina fou o Setema.
O se tasi o polokalame tau taaloga ua amata nei ona faagasolo mo le vaiaso o le faaaliga o Measina o le taamilosaga kilikiti faasamoa lea na amata i le Aso Gafua o le vaiaso nei.
O loo faagasolo le taamilosaga o lea taaloga i Upolu ma Savaii e sa’ili ai ‘au pito i luga e tausiniō i le sa’iliga o le siamupini i le vaiaso e amata ai le Measina Festival.
Ua faailoa e le Pulega o Tagata Tafafao i se pepa faalauiloa, o le afioga i le Palemia o le ta’ita’ifono o le komiti o le Measina Festival ae sui ta’ita’ifono ai le afioga i le Sui Palemia.
