O Safuneituuga Lomia Tiatia o se matai tausi aiga mai Safune i Savaii, ma o le 15 o tausaga o faagaioi lana atina’e o faamoega lagomeli e maua ai le meli suamalie poo le honey. malosi lea ia te ia i le faaaoogaina o ona alo, ao isi foi fuafuaga a lona aiga e mana’onia ai le tupe. O ia o se tasi o faipisinisi laititi na fesoasoani iai le polokalame o pisinisi laiti lea ua atoa nei le 30 tausaga talu ona faavaeina i Samoa.

O le maketi o loo faia nei i le lotoā o le kolisi o Maluafou, o loo iai ma le susuga Safuneituuga Lomia o loo faalauiloa ai ana fagu meli suamalie poo fagu honey.

O lana molimau e ese le mana’omia e tagata o lea taumafa e pei ona ia faamatala, o le aso muamua o le maketi e lelei ana tupe na maua.

O le maketi lea o se tasi o polokalame o faalauiloa mo le Fono a Malo o le Taupulega.

O le to’atele o i latou o loo faalauiloa a latou oloa gaosi eseese faapea fua o faato’aga i le maketi i le kolisi o Maluafou, ua maualuga tulaga o a latou atina’e ona o le fesoasoani a le ofisa o pisinisi laiti lea ua faaigoaina nei o le Samoa Business Hub, ae sa iloa i lona igoa muamua o le Small Business Enterprises poo le SBEC.