Ua teu malu nei i le nofoaga o le ofisa autu o leoleo e masani ona tuu ai laau faasāina e maua i osofaiga a leoleo, le lima afe o laau maruana na maua i se isi osofaiga a Malu o le Malo na agai i le afioaga o Faleatiu i le Aso Tofi o le vaiaso nei.

E lē gata o laau faasāina na maua, ae o laau malosi, ma fatulaau o le maruana.

Faaalia i se pepa o faamatalaga mai le matagaluega o leoleo falepuipui ma le ola toe fuataina, a faatau ma taulia uma laau maruana e lima afe, e 250 afe tala le tupe e maua ai.

E toalima tagata ua taofia ona o loo masalomia i lo latou aafia i le totōina ma le umia o ia laau faasāina.

E lē o se osofaiga muamua lea i Faleatiu ua maua ai ni togalaau maruana.

Na faatino lea galuega a leoleo ona o ni faaseā mai nisi o le afioaga na latou faailoa ia gaioiga solitulafono.

I se tasi o tala mai le auaunaga a leoleo, o loo faia se isi suesuega i le maliu o se tamaitai Tonga e faapea na malaga mai e asi ma tafao i sana uotama o se Samoa, ae fano ai lona soifua.

Ua faatonuina leoleo e le faamasino o le pule o maliu poo le coroner e faia se suesuega ma faatino se taotoga faapitoa e saili ai le mafuaaga tonu o le maliu.