O le galulolo na tula’i mai i le tausaga e 2009 ma feagai ai nisi o nuu ma afio’aga o le motu o Upolu ma mafatiaga ogaoga i le faaleagaina o meatotino ma fano ai soifua o nisi, e lē mafai ona galo e ui ua silia nei ma le 16 tausaga talu ona tupu lea mala faalenatura.
O pitonuu o Saleapaga ma Si’upapa i le itumalo o Lepa o nisi o nofoaga sa sili ona ogaoga aafiaga i lea galulolo malosi na māfua i ni mafui’e se lua na lūlū i le aso 29 o Setema o le tausaga e 2009.
Talu mai lena taimi o loo faaauau pea polokalame faalauiloa o loo feagai ma le Matāgaluega o Puna’oa Faalenatura ma le Si’osi’omaga i le faia o a’oa’oga e tapenapena ai tagata uma o le atunuu pe a tula’i mai se galulolo.
Ua faailoa e le matāgaluega le mae’a o se tasi o ana polokalame faalauiloa mo tagata o Saleapaga ma Si’upapa sa faia i le vaiaso nei, ma o le autū ia silafia e tagata o ia afio’aga gaioiga uma e tatau ona faatino i le tula’i mai o se tsunami poo se galulolo.
O le tāua o ia polokalame faalauiloa ma a’oa’oga o le faasaoina o ola ma soifua pe a aafia Samoa i lea ituaiga o mala faalenatura.
O le galulolo ia Setema o le tausaga e 2009 na fano ai soifua e 149.
O Amerika Samoa e 34 soifua na fano ai ma Tonga e to’aiva tagata na maliliu ai.
