I le savalia ai o le lua tausaga talu ona pasia e le Palemene le tulafono e tatau ai i tagata uma o le atunuu ona umia le pepa e iloa gofie ai tagata ta’itasi poo le National ID, o lea ua faamautū lea fuafuaga a le malo ina ua sainia ai le konekarate mo le faagaioia o lea ID e le kamupani o le KVA Consult.
O le Aso Lulu o le vaiaso nei na sainia ai e le Minisita o le Ofisa o Numera Faamaumauina a le malo ma le sui o lea kamupanī le konekarate.
O le tāua o le umia o le pepa e iloa ai faamatalaga e faatatau i se tagata e mafai ai ona aoina faamaumauga o faamatalaga mo galuega ma auaunaga eseese a le malo.
O se ID foi o le a mafai ona faaaogā e faamaonia ai se tagata aemaise lava i le aga’i i le falema’i, poo isi auaunaga o loo tāpā ai se pepa faamaonia o se tagata.
O le taimi nei o loo tele ina faaaogā tusifolau ma laisene avetaavale, faapea le pepafanau poo se ID o le NPF.
O le auaunaga a le ofisa o numela faamaumauina a le malo o le a vaaia le galuega o le saunia o lea pepa faamaonia o se tagata poo le National ID.
