O le lagona alofa i leoleo e aafia i ni faalavelave a o faatino o latou tiute, o le autu lea o le asiasiga a le Sui Komesina o le Matāgaluega o Leoleo, Falepuipui ma le Toe Fuata’ina faapea nisi o le pulega sa asia ai le susuga i le malu o le malo na aafia i le faalavelave tau taavale i le vaiaso ua mavae.
O le susuga Ietitaia Panipasa na aafia i le faalavelave a o faia lana tiute i le vaega o le alatele i le afio’aga o Lepea o loo iai molī faasino ala, ma o loo taofia pea o ia i le maota gasegase o Tupua Tamasese Meaole, lea sa afea e le Sui Komesina i lana asiasiga i le amataga o le vaiaso nei.
Ua faailoa e le matāgaluega o le itu tāua o lana pitolaau o le saogalemu o alii ma tama’ita’i leoleo, ma o le tatalo foi lea i le atunuu ina ia faatāua lea tulaga i taimi ma aso uma e faia ai le galuega a malu o le malo.
Ua faasolosolo manuia togafitiga o le susuga i le alii leoleo o Ietitaia e pei ona faailoa e le matāgaluega, ma o loo maualuga le talitonuga ua lata ina toe faafoisia lona malosi e toe faaauau ai ona tiute faaleoleo.
