O le masina na te’a nei o Iuni sa molimauina ai i se ata video mai meapu’eata o le pamu penisinisi o le Le Lama i Motootua lea o loo sosoo ma le faleoloa o Lynn Netzler, se gaioiga a se alii talavou na ia se’i ai le ato sa iai tupe o le pamu penisini, a o savali atu se tagata faigaluega o se tama’ita’i ma le ato ina ua uma ona faitau ma siaki tupe o le pamu.
O lea ua faailoa e leoleo ua pu’eina lea alii talavou ma ua molia i le faia o lea solitulafono.
O mea pu’eata CCTV poo security cameras o se fesoasoani tele lea i sa’iliga o gaioiga solitulafono ua tutupu i le atunuu ma aafia ai pisinisi ma fale o nisi o aiga e tuufua ae o i a’oga ma galuega.
Ua tālia nei le aso e tula’i ai lea taulealea i le faamasinoga ae ua nofo taofia nei i le vaaiga a leoleo.
