Ua faailoa mai i se ripoti o sa’ili’iliga ma iloiloga i le to’ese i Waikato, lea ua faamauina ai le tele o faafitauli mai lea falepuipui, le Spring Hill.
O ia faafitauli e aofia ai le faigofie ona maua e pagota o fuālaau faasāina i totonu o le falepuipui, o le lē lelei o sela ma potu e nonofo ai pagota; e lē gata i lea o loo molimauina le lē lelei o amioga ma faatinoga o galuega a tagata faigaluega.
Faamaonia i nei sa’ili’iliga a le ofisa o le Inspectorate, ua 5 tausaga e le’i toe faia lava ni su’esu’ega o le tagofia o fuālaau faasāina poo onsite drug testing a pagota,
O isi pagota e faamauina le lē lava o lavalava poo ofu e faaaogā i aso ta’itasi, lē lelei ie e faaaogā e ufiufi ai o moega e momoe ai i le po ma le tulaga faalētonu o mea’ai e aai ai i latou o loo taofia i le to’ese.
I faamaumauga e pei ona lipotia mai e le leitio faavaomalo a Niu Sila, na mua’i faatulaga lea falepuipui e taofia ai le 650 o pagota ua faamaonia ma faasala i le tulafono, ae peita’i ua faamauina e silia ma le 800 pagota o loo taofia i lea falepuipui, e to’atele o ē o loo taofia i le vaavaaiga a leoleo e tālia a latou matāupu.
Ua faamanino mai e le Auaunaga o Falepuipui ma le Toefuata’ina o le tele o nei faafitauli ua mae’a fo’ia, e pei o le toe faatulaga o su’esu’ega o le tagofia ai o fuālaau faasāina, lea na toe amata faatino mai i le aga’i mai i le faai’uga o le tausaga talu ai e 2025, ma le faaopoopo ai o tagata faigaluega e to’a 45.
Puna o Faamatalaga: https://www.rnz.co.nz/news/crime-and-justice/759340/waikato-prison-inmates-were-readily-accessing-contraband-report-finds
