O tagata taaalo i le taaloga o le fe’ausi poo le swimming mai Niu Sila ma Ausetalia o loo tausiniō ma nisi i Samoa e fiafia i le atina’eina o lea taaloga e pei ona faagasolo lea fe’ausiga i le vaiaso nei.
O le Aso Gafua na amata mai ai i gataifale o le faletalimalo o le Samoa Beach Resort i Mulifanua ma afea ai ogasami i le afio’aga o Manono Uta, ae o le Aso Lua sa amata mai i gataifale o le malae vaalele faavaomalo i Faleolo ae tini atu i gataifale o le faletalimalo o le Samoa Beach Resort.
Ua faamoemoe o le Aso Lulu ma le Aso Tofi o le vaiaso nei e siitia atu ai le fea’usiga i Siumu i le nofoaga o loo iai le faletalimalo o le Sinalei ona toe foi ane lea i Manono Uta ma aga’i atu i le motu o Manono.
E to’aono le ‘aufe’ausi mai Niu Sila ae to’alua mai Ausetalia o loo tausiniō ai, ma le to’a luasefululima o le ‘aufe’ausi i Samoa.
O se tasi lea o taaloga ua molimauina le alu alu pea i luma ma to’atele le tupulaga talavou o le atunuu ua fiafia e auai.
Ua faaigoaina lea taamilosaga fe’ausi o le Festival of Ocean Swimming ma e faia i le taimi lenei i tausaga ta’itasi.
O le Samoa Events sa tapenaina lea taamilosaga o le taaloga fe’ausi e pei foi ona sa tapena e lea auaunaga tuma’oti le taufetuliga poo le malafoni sa faia i se vaiaso e le’i mamao atu.
E 106 tagata taufetuli sa auai ma o nisi foi sa tausiniō ai e malaga mai atunuu e pei o Amerika, Ausetalia, Niu Sila, Saina, Iapani ma Fiti.
