Ua faailoa mai e le MetService poo le auaunaga a le vaaitau, e lē o toe umi ae muta le feagai o le atunuu ma tulaga taugalemū o le tau; ae o le a molimauina foliga loulouā o le tau, i le mamafa o timuga, emo o uila ma pā pā faititili, ma matagi malolosi faapea le mamafa o le pa’ū ai o le kiona i nai aso o i luma.
Faamauina i ripoti mai le NZ Herald, o loo faaalia ai o le Aso Tofi o le asō lea, o le a vaaia le aafia o nisi o nofoaga i le South Island, e pei o Westland o le a aafia i uila ma faititili, ae o Fiordland ma Stewart Island ua māua le feagai ma timuga mamafa.
Faailoa poo le 10 aga’i i le 25 milimita le telē o le suāvai timu e pa’ū i totonu o le itula, ma le malolosi o matagi e oo atu i le 90 kilomita i le itula le saoasaoa.
Ta’ua foi, e ono molimauina le pa’ū o le timu i faaitu o Fiordland.
O le Aso Toona’i, o loo māua le fetaia’i ai o le atunuu ma ni matagi malolosi ma le mālūlū tele mai Saute i Sisifo ma le ono pa’ū ai o le kiona i nofoaga maualuluga faapea atumauga o South Island.
Faaalia i ripoti e lē o iai ni aafiaga i North Island se’i vaganā ai Aukilani, na molimauina le malosi o le puaoa i le taeao analeila, lea na faaletonu ai le tele o faigāmalaga i luga o le ea ma galuega i le malae vaalele; e pei ona faamauina, e silia ma le 40 malaga faalotoifale na lē faataunuuina pe na toloa ona o le lē saogalemū o le feoa’i atu ai.
Ua fautuaina foi avetaavale ina ia ave ma le faaeteete taavale i luga o auala.
Ua faailoa mai e le ofisa o le vaaitau, o le a amata ona toe vaaia tulaga lelei o le tau i le Aso Sa o muamua nei.
Puna o Faamatalaga: https://www.nzherald.co.nz/nz/metservice-forecasts-rain-thunder-and-snow-as-winter-weather-shifts/WIX42KLWVRDABPVPYQQMHBO3YM/
