O le atina’eina o le atunuu i le itu i faato’aga ma le taimi e selesele ma faatau atu ai i le atunuu, o loo mafai ona iloa le tulaga lelei o ia seleselega tau faato’aga ma o latou tau mai lea taimi i lea taimi, i le galuega o loo aoina ai faamatalaga ma faamaumauga e le ofisa o numera faamaumauina poo le Samoa Bureau of Statistics.
I le lipoti a lea ofisa mo le masina o Iuni o loo faailoa ai le faaitiitia o le maua i maketi i le masina na te’a nei, o nisi o fua tau faato’aga e pei o le talo e 33 pasene sa faaitiitia ai, o ‘ulu e 76 pasene, ma maukeni e 59 pasene.
O loo faailoa ai foi le siitia o tau o ia fua tau faato’aga e pei o le talo na sii i le 24 pasene le tau, o le fa’i e 14 pasene ae o le maukeni sa sii le tau ia Iuni i le 23 pasene.
E oo lava i tagata sa faatau atu oloa ma fua o faato’aga i maketi sa faaitiitia i le 9 pasene i se aofa’iga e 237.
O popo, taamū ma fuālaau’aina suamalie ma fuālaau’aina taumafa mata sa siitia le maua i maketi, ma o le iai o mugalā o loo aafia ai le atunuu i lenei taimi o le tausaga o se tau e lelei mo nisi o fualaau’aina faisua e pei o kapisi, pi, kukama, ma le tamato.
