Ua talia e le Faamasinoga Faaitumalo le faaaogā o le faamatalaga tusitusia a Papalii Sia Figiel ua maliu, i le su’esu’eina o molimau e lagolago ai moliaga ua tuua’ia ai le tama’ita’i o Lise Marie Schmidt.
E ui ina talia le faamatalaga tusitusia poo le statement peita’i e mana’omia e le faamasinoga nisi mau a leoleo e lagolago atili ai lea faamatalaga tusitusia.
O le faai’uga lea a le faamasinoga i le talosaga a leoleo sa finau ai e faaaogā aiaiga o le tulafono e talia ai ni mau faalogo poo se hearsay evidence, e māfua ona o Papalii Sia Figiel o se tasi o a latou molimau autū ua maliu, ma ua lē mafai ai ona tula’i e faia sana mau tuu fofoga, ma avanoa ai loia a lē ua molia e fesiligia i le moni ma le faamaoni o lana faamatalaga tusitusia na tuuina atu i leoleo a o le’i maliu.
Ua lē talia le finauga lea e faaaogā aiaiga o le tulafono e talia ai le faamatalaga i aiaiga o mau faalogo, ae ua talia e faaaogā pea o se vaega o molimau a leoleo ma le fautuaga e tatau ona iai nisi mau e lagolago ai lea faamatalaga.
Sa teena e loia a lē ua molia le faaaogā o le faamatalaga ona e lē faatuatuaina e māfua ona sa faia lea faamatalaga i leoleo a o nofo taofia Papalii Sia mo su’esu’ega i le solitulafono o le fasioti tagata faamoemoeina, ma le fasioti tagata pa’ivalea.
O Ianuari o le tausaga nei na maliu ai a o taofia i le falepuipui i Tanumalala e faatali le lauina o le faai’uga i ona moliaga.
O Lise Schmidt e 19 moliaga a leoleo o loo tuua’ia ai, ma o moliaga e māfua mai i se su’esu’ega a leoleo i ni tusi sa tuuina atu e lē ua molia i le Ao o le Malo ma le Komesina o leoleo i le tausaga e 2025 sa ta’ua ai ni aafiaga o lē sa avea ma Palemia le afioga Fiame Naomi Matā’afa i le maliu o Caroline Sinavaiaana Garbbard.
O le aso 31 o le masina fou o Aokuso ua toe faatulaga e le faamasinoga e valaau ai molimau o lea faamasinoga ae ua lē o le masina o Novema.
