Ua faailoa mai e le faigāmalo a Guyana e 10 tino maliliu na maua ane mai le vaa lea na sa’e i gataifale o le atunuu i le faai’uga o le vaiaso lea na lipotia e 133 le paaese na iai.
O lipoti aupito lata mai o lea faalavelave ua ta’ua ai e le CNN o loo iai le popolega e maualuga atu le aofa’i o le aumaliliu mai lea faalavelave ma o loo feta’ua’ina foi e foliga na faaaogā e le auvaa ni fuālaau faasāina o se tasi lea o māfua’aga o le tula’i mai o le faalavelave.
Fai mai o le faalavelave na tupu i le Aso Toonai ma o le Aso Sa na lipotia ai e 67 tagata ua lavea’iina e aofia ai ma tamaiti e to’a 15 peita’i e le’i toe iai nisi na faasaoina mai talu mai le Aso Sa.
O le kapeteni ma isi o le auvaa ua taofia nei e leoleo e pei ona faamaonia mai e le Minisita o Galuega Lautele.
O loo faaauau pea sa’iliga ae o le vaa ua faaletonu o le MV Barima e 116 le pasese ma le auvaa e 17 na goto a o malaga ane mai le laumua o Guyana o Georgetown aga’i i le nuu o Port Kaituma.
Ta’ua i lipoti o le kapeteni o le vaa ma nisi o le auvaa ua faamaonia le faaaogāina o mariuana ma o loo iai foi nisi pasese na lavea’iina ane i le Aso Sa e lē o iai igoa i le lisi o pasese a le vaa mo lea faigāmalaga.
Puna o Faamatalaga: https://edition.cnn.com/2026/07/20/americas/guyana-shipwreck-intl
